𑵰𑶊𑵭𑶍𑶈 𑵰𑶍𑵱𑶐 𑵭𑶊𑵵𑶋𑶈

𑵰𑶊𑵭𑶊 𑵡𑵸𑶋𑵭𑶊𑶉𑶋 𑵶𑶓𑶕𑶂𑶋/𑵱𑶓𑵬𑶊 𑶉𑵰𑶊𑶀𑶗𑵺𑵶𑶊 𑵭𑶐𑵵𑶐𑵽𑶋𑶈 𑵰𑶍𑵱𑶐 𑵵𑶓𑵱𑶍𑶈 𑵰𑶕𑵳𑶐𑶈. 𑵭𑶎𑶈 𑵰𑶊𑵭𑶊 𑶉𑵰𑶊𑶀𑶗𑵺𑶍𑶈𑵱𑶍𑵺 𑶉𑶍𑵸𑶗𑶈𑶋 𑵱𑶋𑵬𑵺 𑶉𑶊𑵽𑶋 𑵳𑵰𑶗𑵭𑶊 𑶀𑶋𑵺𑶗𑵶𑵺𑶋𑵳𑵶𑶊 𑵮𑵻𑶗𑵻𑶓𑶄𑶓 𑵡𑶅𑵳𑶋𑶄 𑵮𑶓𑵶𑶐 𑵰𑶊𑵳𑶐𑶈. 𑵭𑶎𑶈 𑵶𑵽𑶋-𑵸𑶌𑶈𑶗𑵬𑶊 𑵱𑶌𑶉𑶋 𑵳𑶊𑵱𑶗𑵳𑵳𑶍𑵺 𑶇𑶋𑶕𑵸𑵵 𑵰𑵰𑶓𑵽 𑵢𑶕𑵱𑶐 𑶉𑶍𑵱-𑶉𑶊𑶕𑵳𑶗𑵺𑶐 𑶅𑶋𑶉𑶐𑶈 𑵰𑶕𑵳𑵽. 𑵭𑶎𑶈 𑵰𑶊𑵭𑶄 𑶇𑵱𑶍𑵺 𑶉𑶊𑵽𑶋, 𑵰𑶊𑵭𑶄 𑵮𑶓𑵰𑶋𑶄, 𑵬𑶐𑶈 𑵠𑵺𑶋 𑵱𑶐𑶂𑵳𑶍𑵺 (𑶀𑵵, 𑶀𑶄𑵵, 𑶀𑵰𑶋𑵺) 𑶉𑶊𑵽𑶋 𑵮𑵻𑶗𑵻𑶓𑶈𑶐 𑵵𑶂𑶐 𑵰𑶊𑵳𑶐𑶈. 𑵳𑵰𑶗𑵭𑶄 𑶀𑶌𑵭𑵺 𑵠𑶈𑶗𑶅𑵺𑶊 𑵶𑶋𑶈 𑵱𑶌𑵳𑶐𑶈.

𑵭𑶎𑶈𑶗𑵶𑵽𑵵 𑵱𑶇𑶋𑵳𑶍𑶈 𑵰𑶍𑵱𑶐 𑵭𑶊𑵵𑶋𑶈 𑵮𑶎𑶈 𑵢𑵳𑶗𑵳𑶐𑵱𑶐 𑵱𑶍𑵰𑶗𑶈𑵰 𑵮𑶌𑵰𑶍, 𑶈𑶊𑵺𑶗𑶀𑶋 𑵶𑶓𑶕𑶂𑶍, 𑵮𑶌𑶈𑶗𑶉𑵰𑶍𑶕𑶂𑶊 𑵢𑶕𑵭𑵵𑶋𑶈 𑵰𑶊𑵭𑶍𑶈 𑵳𑶊𑵸𑶍𑶈-𑵮𑶊𑵮𑶍𑶈 𑵡𑶕𑵸𑶋𑶈. 𑵠𑶇𑶗‍𑵺𑶐 𑵰𑶊𑵭𑶄 𑶇𑵱𑶍𑵺 𑶉𑶊𑵽𑶋 𑵠𑵺𑶋 𑵰𑶊𑵭𑶍𑶈 𑵻𑶓𑵱𑶓𑵽 𑶅𑶋𑶉𑵺 𑶉𑶊𑵽𑶋 𑶅𑶈𑶗𑶅𑶐𑶂𑶐 𑵰𑶊𑵳𑶍𑶈 𑵮𑶎𑶈 𑵢𑵳𑶗𑵳𑶐𑵱𑶐, 𑶇𑶑𑵰𑵺 𑶂𑶊𑶈𑶗𑶅 𑶉𑶊𑵮, 𑵰𑶂𑵭𑶋 𑵳𑶍𑵱𑶊𑶈𑵰 𑶉𑶊𑵮 𑵡𑶕𑵸𑶋𑶈. 𑵠𑶇𑶗‍𑵺𑶐 𑶂𑶊𑵱𑶗𑵽𑶈 𑵰𑶓𑵳𑶋𑶈𑶊𑵭𑵺 𑵱𑶄𑶊𑵵𑶋 𑶉𑶊𑵮 𑵰𑶊𑵭𑶊 𑵶𑶓𑶕𑶂𑶋 𑵮𑶊𑶉𑵳𑶍𑵺 𑵠𑵺𑶋 𑵶𑶓𑶕𑶂𑶋 𑵸𑶈𑶗𑵰𑵳𑶍𑵺 𑵰𑶍𑵺𑶐 𑵭𑶓𑵬𑵺 𑶉𑶊𑵽𑶋 𑵭𑶐𑵵𑶐 𑵱𑶓𑶉𑶋𑵸 𑵱𑶌𑵳𑶓𑶈. 𑵭𑶌𑶈 𑶉𑵰𑶗𑵸𑶋𑶈𑶊 𑵱𑶊𑵬𑶊-𑵱𑶉𑶗𑵽𑵰𑶗𑵺𑶊 𑶅𑶕𑶂𑶋𑵳𑶍𑵺 𑶇𑶋𑶕𑵸𑵵𑶐 𑵰𑶈𑵽 𑵢𑶕𑵱𑶐 𑵰𑶊𑵭𑶊 𑵮𑶓𑵰𑶋𑵳𑵶 𑵰𑶈𑵽 𑶅𑶕𑶂𑶍𑶉𑶗𑵳𑶊 𑶅𑶕𑵽𑵳𑶍𑵺, 𑵰𑶊𑵭𑶄 𑶈𑶓𑶇𑶗‍𑵱𑶗𑵺𑵶𑶊 𑵰𑵺𑶗𑶀𑶐𑶈 𑶅𑶐𑵽𑶋𑵰𑶐𑵺 𑵳𑶋𑵺𑶗𑶀𑶐𑶈 𑵰𑶕𑵳𑵽. 𑵠𑵸𑶐𑵺 𑶉𑶊𑵽𑶋 𑵰𑶈𑵽 𑵭𑶎𑶈 𑵰𑶍𑵱𑶐 𑵭𑶊𑵵𑶋𑶈 𑵳𑶊𑵸𑶍𑶈-𑵮𑶊𑵮𑶍𑶈𑵱𑶍𑵺 𑶇𑶐𑵳𑶍 𑵱𑶌𑶉𑶐𑶈, 𑵭𑶎𑶈𑵱𑶍𑵺 𑵰𑶊𑵺 𑶉𑶌𑶉𑶐𑶈, 𑵸𑵺𑶐𑵭𑶊𑵸 𑵭𑶐𑶇𑶗‍𑵭𑵵𑶋𑶈 𑵡𑶉𑶋 𑵰𑶕𑵸𑵺𑶊 𑵢𑵺𑶗𑶀𑶐𑶈 𑵱𑶓𑶈𑵺𑶗𑶀𑵺 𑵱𑶌𑶉𑶐𑶈 𑵰𑶕𑵳𑶓𑵰.